देस के सबले साफ-सुथरा राज छत्तीसगढ़

बिचार

छ त्तीसगढ़ ल येसो देसभर म सबले सफ्फा (साफ-सुथरा) राज के मान मिले हे। ऐहा बहुत बड़का सनमान ए। छत्तीसगढ़ ह मन के साफ तो रहिबे करिस। वोला अब हर तरह ले सबले साफ राज के सम्मान मिलगे। संत पवन दीवान के गीत के सुरता आवत हे – ‘जय जय छत्तीसगढ़ महतारी…।Ó
छत्तीसगढ़ के पहिचान बर हमर पुरखामन जउन काम करे हे उही रद्दा म चलइयामन ल इहां मान मिलथे। गुन्निक बेटामन अपन बलभर छत्तीसगढ़ के मान बढ़ाय बर काम कर के जस कमइन। हमर छत्तीसगढ़ ल माता कौसल्या के मइके माने जाथे। भगवान राम इहां के भांचा ये तेकरे सेती इहां भांचामन के पांव परे जाथे। भगवान राम ह अपन बनवास के दस बछर ल छत्तीसगढ़ अउ वोकर से लगे जंगल म बितइस। छत्तीसगढ़ के तुरतुरिया म बाल्मीेकि के आसरम रिहिस, उहें राम के बेटा लव अउ कुस के जनम होइसे।
छत्तीसगढ़ ल दछिन कौसल केहे जाथे। माने जाथे के कुस ल छत्तीसगढ़ के राज मिलिस अउ लव ल अयोध्या के। अइसन महिमावान छत्तीसगढ़ के बारे म कवि दलपत राव 1497 म, गोपाल मिस्र ह 1689 म अउ रेवाराम बाबू हे 1848 म कविता लिखिस। केहे जाथे कि छत्तीसगढ़ म कुल 5722 गांव रिहिस। हैहयवंशी राजामन के बाद इहाम मराठा अउ अंगरेजमन राज करिस। 5722 गांव के बासिंदामन म आदिवासी, दलित, पिछड़ा वर्ग के संगे-संग धीरे-धीरे उच्च वर्ग के मनखे आवत गिन। मराठा अउ अंगरेजमन के सासनकाल म बड़े-बड़े पद म बइठिन। साधारन गांव वालामन ल पढ़े-लिखे अउ अंडिय़ा के चले के मौका नइ मिलिस । मालगुजारी सासन म गांव म पौनी-पसार अउ काम-काज, जस-अपजस सब मालगुजार देखय।
ऐहा संयोग ये के बड़का मालगुजार खानदान म जन्में भूपेस बघेल ह हमर छत्तीसगढ़ के मुख्यमंत्री हे। ‘नरवा, घुरवा, गरवा, बारी, छत्तीसगढ़ के इही चिन्हारीÓ ये नारा ल भूपेस बघेल ह तब दिस जब वोहा छत्तीसगढ़़ कांगरेस के अध्यक्छ रिहिस। तब ये नारा के बारे म जादा जानबा नइ रिहिस। जब मुख्यमंत्री बनिस तब भूपेस बघेल ह गांव के जिनगी से जुड़े सब कारबार के बढ़वार बर संसो करिस। रोका, छेका, गोठान अउ गोबर खरीदी ऐहा उही नारा के अगला चरन ये ऐला अब सब जानिन।
भूपेस बघेल ह पाटन छेत्र के गांव बैलौदी अउ कुरूदड़ीह म खेलिस-बाढि़स। अपन गुरु वासुदेव चंद्राकर के सबले काबिल चेला बन के निकलिस। दाऊ वासुदेव चंद्राकर ह किसान नेता रिहिस। वोहा भूपेस ल समझइस के छत्तीसगढ़ म जउन किसान के दुख ल समझही, उही ल जनता के आसीरबाद मिलही। भूपेस ह ये बात के मरम ल समझिस।
पहली पइत देस के कोनो राज्य म गोबर के खरीदी होवत हे। समझे के बात ये के गोबर कोन बिनथे। गरीबहामन। नागर कोन जोतथ, किसानमन। त गरीब अउ किसान के दिन बहुर (फिर) जाय ये कोसिस म लग हेे भूपेस ह । राहुल गांधी अपन भासन म केहे हे के छत्तीसगढ़ के किसान के पइसा वोला मिले बर चाही। मजदूर, छोटे दुकानदार के पइसा वोला मिले बर चाही। इलाज बर पइसा मिले बर चाही। पढ़ई के इंतजाम होय बरचाही। भूपेस बघेल ये सब काम करत हेे।
छत्तीसगढ़ म ये काम अच्छा होवत हे। गरीब के पइसा नगा के पंदरा-बीस बड़े धनकुबरेमन ल अउ बड़े बनई ह गलत हे। ये किहिस राहुल गांधी ह। किहिस के छत्तीसगढ़ सरकार ह गरीबमन के रक्छा करइया सरकार ए। भूपेस ह पाटन छेत्र म गांधी विचार यातरा म निकलिस। वोकर अघुवई करिस। गांव-गांव हमन साहित्य, कला, समाजसेवा से जुड़े सब सहजोगीमन रेंगत गेन।
20 अक्टूबर से 29 अक्टूबर 2002 म हमन गांधी विचार यातरा करेन । जामुल ले यातरा सुरू होइस। भिलाई 3, मोरिद, चरोदा, नंदौरी, कुम्हारी, उरला, पहंदा, जामगांव, घुघुवा, सेलूद, गाड़ाडीह, सांतरा, अरसनारा होवत पाटन म 28 अक्टूबर के पहुंचेय। 29 के बड़े भारी जलसा होइस पाटन म। दिनभर रेगन अउ बियारी करन सतनामी पारा म । ये यातरा म भूपेस बघेल ल सियानमन के असीस मिलिस। आज ये यातरा म असीस देवइया बहुतझन सियान हमर बीच नइये। उंकर आसीरवाद फलगे। भूपेस मुख्यमंत्री बनगे।
अरपा-पइरी के धार गीत ल राजगीत बना के जम्मो छत्तीसगढ़ के हितवामन ल भूपेस ह अइसन उपहार दे दे हे जेकर चरचा तब तक चलही जब तक दुनिया म छत्तीसगढ़ रिही। अपन बड़े सोच वाला पुरखामन के बताय रद्दा म चलइयामन सदा ऊंच पद पाथे। ये बात ह सिद्ध होगे। आसा हे भूपेस बघेल ह पुरखामन के सपना के छत्तीसगढ़ बना के अउ जस पाही। छत्तीसगढ़़ हर तरह ले देस म अलग पहिचान पाके जगमग करही ये बिसवास हे । रेवाराम बाबू लिख दे हे। ‘तिन में दक्षिन कोसल देसा, जहं हरि ओतु केसरी बेसा, तासु मध्य छत्तीसगढ़ ़ पावन, पुण्य भूमि सुर मुनिमन भावन, रतनपुरी तिनमें हे नायक, कासी सम सब बिधि सुखदायक।
भूपेस बघेल ह गांव के तस्वीर बदले के संकल्प लेके बहुत बड़े काम करत हे। छत्तीसगढ़ी भासा म जादातर अपन भासन ल भूपेस देथे। डॉ. नरेन्द्र देव वरमा के नाव के अगासदिया सम्मान समारोह म सरलग हमन गांव -गांव म सभा करेंन। छत्तीसगढ़ के कलाकारमन ल सम्मान देन। संत पवन दीवान ह ये सम्मान समारोह म मुख्य अतिथि राहय। भूपेस बघेल अध्यक्य राहय।